பாஜகவிலும் தலைவிரித்தாடும் வாரிசு அரசியல் !

இந்தியாவின் உள்துறை அமைச்சர் அமித்ஷா கடந்த 21ஆம் தேதி மெட்ரோ ரயில் உள்ளிட்ட பல்வேறு வளர்ச்சி திட்டப்பணிகளுக்கு அடிக்கல் நாட்டுவதற்கு தமிழகம் வந்தார். அப்போது நடந்த அரசு விழாவில் பேசிய அமித்ஷா “தமிழகத்திலும், நாட்டின் பிற பகுதிகளிலும் சில கட்சிகள் குடும்ப அரசியலை நடத்தி வருகின்றன. பிற மாநிலங்களைச் சோ்ந்த மக்கள், அங்குள்ள கட்சிகள் நடத்தும் குடும்ப, வாரிசு அரசியலுக்கு எதிராக சரியான பாடத்தைப் புகட்டியுள்ளனா். தமிழகத்திலும் அதுபோன்ற பாடம் புகட்டப்படும். பாஜக மக்களின் துணை கொண்டு வாரிசு அரசியலுக்கு முடிவு கட்டப்படும்” என்று கூறினார்.

உள்துறை அமைச்சர் அரசு நிகழ்வை அரசியல் நிகழ்வாக தனது பேச்சு மூலம் மாற்றி உள்ளார் என பலரும் விமர்சித்துக்கொண்டுள்ள நிலையில் உன்மையில் பாஜகவில் வாரிசு அரசியல் உள்ளதா, இல்லையா என்பதை இந்த பதிவின் வழியே அறிந்து கொள்ளலாம். உதாரணத்திற்காக சில முக்கிய தலைவர்களின் வாரிசுகள் அங்கம் வகிக்கும் பதவி மற்றும் தேர்தலில் போட்டியிட்டதைக் குறிப்பிட்டு உள்ளோம்.

இங்கு உதாரணத்திற்காக மட்டுமே பாரதிய ஜனதா கட்சியின் சில அமைச்சர்கள், தலைவர்கள் மற்றும் அவர்களின் வாரிசுகள் கட்சி பதவி குறித்து குறிப்பிட்டு உள்ளோம். நேரு குடும்பத்தில் இருந்து குடும்ப, வாரிசு அரசியலை நிறுத்த வேண்டும் எனத் தொடர்ந்து பேசும் பாஜக, நேரு குடும்பத்தில் இருந்து வந்த மேனகா காந்தி மற்றும் அவரின் மகன் வருண் காந்திக்கும் பதவி வழங்கி இருக்கிறார்கள். ஒரு குறிப்பிட்ட குடும்பத்தில் இருந்து நாட்டை மீட்க வேண்டும் எனக் கூறி அவர்களை அமைச்சர் ஆக்குவதும், அவர்களின் வாரிசுகளுக்கு பதவி வழங்குவதையும் பாஜக செய்துள்ளது.

வாரிசு அரசியல் என்பது பாரதிய ஜனதா கட்சியில் மட்டும் இல்ல, காங்கிரஸ் போன்ற பெரும்பாலான தேசிய மற்றும் திமுக, அதிமுக, பாமக, தேமுதிக போன்ற மாநில கட்சியில் இன்றியமையாத ஒன்றாக வேரூன்றி திகழ்கிறது. பாஜக தன்னை வாரிசு அரசியல் இல்லாத கட்சி என்று முன்னிலைப்படுத்தி கொண்டாலும் அது உண்மை அல்ல என்பதற்கு நிகழ்கால அரசியலிலே பல ஆதாரங்கள் உள்ளன.

சிலர் திமுகவில் குடும்ப அரசியல் இருப்பதை சுட்டிக்காட்டி குடும்ப அரசியல் வேறு, வாரிசு அரசியல் வேறு என விளக்கம் அளித்து வருகிறார்கள். எந்த கட்சியை சேர்ந்தவர்களாக இருந்தாலும் அரசியல்வாதிகளின் பிள்ளைகள், குடும்பத்தினர் அரசியலில் களமிறக்கப்படுகின்றனர் என்பதே நிதர்சமான உண்மை.

அப்டேட் : 

2020-ல் அமித்ஷா வாரிசு அரசியலுக்கு எதிராக பேசியது மற்றும் பாஜக தலைவர்களின் வாரிசுகள் கட்சி பதவிகளில் அங்கம் வகிப்பது தொடர்பான பதிவு சமூக வலைதளங்களில் மீண்டும் பரவி வருகிறது. உதாரணத்திற்காக, சில பாஜக தலைவர்களின் வாரிசுகள் பற்றி குறிப்பிட்டு இருந்தோம்.

ராஜஸ்தான் மாநிலத்தின் முன்னாள் முதல்வர் வசுந்தரா ராஜி சிந்தியாவின் மகன் துஷ்யந்த் சிங் எம்.பி ஆக உள்ளார். வசுந்தரா ராஜி சிந்தியாவின் தாய் விஜய ராஜி சிந்தியா ஜன சங்கத்தை சேர்ந்தவர், பாஜகவை உருவாக்கிய உறுப்பினர்களில் ஒருவர்.

பாஜக ஆட்சியில் வெளியுறவுத்துறை மற்றும் நிதியமைச்சராக இருந்த யஷ்வந்த் சின்ஹாவின் மகன் ஜெயந்த் சின்ஹா எம்.பி ஆக உள்ளார்.  இவர் பாஜக அமைச்சரவையில் இணை அமைச்சராகவும் இருந்தவர். இவரின் தந்தை யஷ்வந்த் சின்ஹா பாஜகவில் இருந்து விலகி திரிணாமுல் காங்கிரஸ் கட்சியில் இணைந்தது குறிப்பிடத்தக்கது.

வாஜ்பாய் ஆட்சிக் காலத்தில் அமைச்சராக இருந்த பிரமோத் மகாஜன் மகள் பூனம் மகாஜன் எம்பியாக உள்ளார். இமாச்சலப் பிரதேசத்தின் முதல்வராக இருந்த பிரேம் குமார் துமால் மகன் அனுராக் தாக்கூர் விளையாட்டுத் துறை அமைச்சராக இருக்கிறார்.

உத்தரப் பிரதேச மாநிலத்தின் தற்போதைய முதல்வர் யோகி ஆதித்யநாத் உடைய வழிகாட்டியான மகந்த் அவைத்யநாத் பலமுறை எம்.பி மற்றும் எம்.எல்.ஏவாக இருந்தவர் மற்றும் நெருங்கிய உறவினர்.

டெல்லி சட்டமன்றத்தின் சபாநாயகராக இருந்த சார்த்தி லால் கோயல் மகன் விஜய் கோயல் 2017-2019 வரையில் மத்தியில் பாஜக அமைச்சரவையில் அங்கம் வகித்தார்.

5 முறை எம்.பி மற்றும் 2 முறை எம்.எல்.ஏவாக இருந்த விஜய் குமார் மல்கோத்ராவின் மகன் அஜய் குமார் மல்கோத்ரா 2013-ல் நாடாளுமன்ற தேர்தலில் போட்டியிட்டார். முன்னாள் பிரதமர் வாஜ்பாய் மருமகன் அனூப் மிஸ்ரா எம்.பியாகவும், எம்.எல்.ஏவாகவும் இருந்தவர். இந்தூரின் முன்னாள் மேயர் கைலாஷ் விஜயவர்ஜியாவின் மகன் ஆகாஷ் எம்.எல்.ஏவாக உள்ளார்.

Links:

India.gov.in

BJP has 16 dynast MLAs in Maharashtra — highest among all parties

https://www.india.gov.in/my-government/indian-parliament/maneka-sanjay-gandhi

http://164.100.47.194/Loksabha/Members/MemberBioprofile.aspx?mpsno=4277

Ask YouTurn

Report Article

Please complete the required fields.

Your Name (required)

Email (required)

Reason (required)
பதிவில் தவறான தகவல் உள்ளது. பதிவில் ஸ்பேம் உள்ளது. பதிவில் வேலை செய்யாத லிங்க் உள்ளது. பதிப்புரிமை. வேறு காரணங்கள்.

Description (required)

Submit

admin