திமுக ஆட்சியில் அரசு பேருந்தில் பின் சக்கரங்கள் குறைவாக உள்ளதாகப் பரவும் 2019ல் எடுத்த வீடியோ !
பரவிய செய்தி
எப்படி அரசு பணத்தை மிச்சம் பண்ணி மக்களுக்கு ஸ்டாலின் அரசு நல்லது செய்றாங்க பாருங்க. பின்னாடி 4 டயர் இருக்க வேண்டிய இடத்தில 2டயர். வாரே வாவ். மற்ற மாநிலங்கள் தமிழகத்தை பார்த்து கற்று கொள்ள வேண்டும்..
மதிப்பீடு
விளக்கம்
திராவிடமாடல் அரசு பேருந்தைப் பாருங்கள், பின்னால் இரண்டு சக்கரங்கள் குறைவாக உள்ளன என்று கூறி 30 வினாடிகள் கொண்ட வீடியோ ஒன்று சமூக ஊடகங்களில் வைரலாகப் பரவி வருகிறது. மேலும் அந்த வீடியோவில், பேருந்திற்கு பின்னால் “பொள்ளாச்சி-திருப்பூர், வழி பல்லடம்’ என்றும் குறிப்பிடப்பட்டுள்ளது.
உங்க அப்பன் வீட்டு காசா??
பொதுமக்கள் உயிர் உங்களுக்கு லேசா??பேருந்துக்கு நான்கு பின் சங்கரங்கள் இருக்க வேண்டும். ஆனால் இந்த திருப்பூர் To பொள்ளாச்சி பேருந்துக்கு இரண்டு பின் சக்கரங்கள் மட்டுமே உள்ளன.
திராவிட மாடலின் லட்சணம். pic.twitter.com/wuimzdtMyL— Sree Kasthuri (@kasthuri_sree) February 6, 2024
உண்மை என்ன ?
பரவி வரும் வீடியோவின் கீபிரேம்களை கூகுள் ரிவர்ஸ் இமேஜ் செர்ச் மூலம் ஆய்வு செய்து பார்த்ததில், இந்த வீடியோ தற்போது எடுக்கப்பட்டதல்ல என்பதை அறிய முடிந்தது.
இதன் முழு வீடியோ, கடந்த 2019 ஜூலை 01 அன்று Jeno Cryspin என்ற யூடியூப் பக்கத்தில் “மக்களின் உயிருக்கு ஆபத்து, அரசு பேருந்தில் 4 சக்கரங்களுக்கு பதிலாக இரண்டு சக்கரங்களே உள்ளன. இரண்டு சக்கரங்களைக் காணவில்லை” என்ற தலைப்பில் பதிவு செய்யப்பட்டிருந்தது. இதன் மூலம் இந்த வீடியோ கடந்த அதிமுக ஆட்சியின் போது எடுக்கப்பட்ட பழைய வீடியோ என்பது தெளிவாகிறது.
இது குறித்து, 2019 ஜூலை 02 அன்று “The Hindu” தனது பக்கத்தில் வெளியான செய்தியில், “நான்கு சக்கரங்களுக்குப் பதிலாக இரண்டு பின் சக்கரங்கள் மட்டுமே கொண்ட அரசுப் பேருந்தின் வீடியோ கிளிப் ஞாயிற்றுக்கிழமை வைரலானதை அடுத்து, தமிழ்நாடு அரசுப் போக்குவரத்துக் கழகத்தின் (டிஎன்எஸ்டிசி) மூத்த அதிகாரி ஒருவரை திங்கள்கிழமை தொடர்புகொண்டு பேசினோம். பதிலளித்த அவர், பேருந்தில் பயணிகள் இல்லை என்றும், அந்த பேருந்தில் ஓட்டுநர் மற்றும் நடத்துனர் மட்டுமே இருந்ததாகவும், செயல்பாடாமல் இருக்கும் பழைய பேருந்துகளை நிறுத்தும், மேட்டுப்பாளையத்தின் பேருந்து முனையத்திற்கு சென்று கொண்டிருந்த போதே இந்த வீடியோ எடுக்கப்பட்டுள்ளது என்றும் அவர் கூறினார்” எனக் குறிப்பிடப்பட்டிருந்தது.
இதே போன்று, DTnext வலைதள பக்கத்திலும் பரவி வரும் இதே புகைப்படத்தை குறிப்பிட்டு கடந்த 2019 ஜூலை 02 அன்றே செய்தி வெளியிடப்பட்டிருந்தது.
மேலும் படிக்க: திமுக ஆட்சியில் கயிற்றால் கட்டப்பட்ட அரசு பேருந்து எனப் பரப்பப்படும் பழைய புகைப்படம் !
மேலும் படிக்க: தமிழ்நாட்டின் சாலை எனத் தவறானப் படத்தை பரப்பும் முன்னாள் அதிமுக எம்பி கே.சி.பழனிசாமி..!
முடிவு:
நம் தேடலில், திமுக ஆட்சியில் அரசு பேருந்தில் இரண்டு பின் சக்கரங்களே உள்ளன எனப் பரவி வரும் செய்திகள் தவறானவை என்பதையும், இது கடந்த 2019ன் போது எடுக்கப்பட்ட பழைய வீடியோ என்பதையும் அறிய முடிகிறது.
ஆதாரம்
