ஹரியானாவில் பாஜக வேட்பாளரை பொது மக்கள் விரட்டியடித்ததாகப் பரவும் தவறான தகவல்!

பரவிய செய்தி

தேர்தல் பிரச்சாரத்துக்கு வந்த ஹரியானா பாஜக வேட்பாளர் கல்லால் அடித்து ஓட ஓட விரட்டிய பொது மக்கள் 

X link

மதிப்பீடு

விளக்கம்

நாடாளுமன்றத் தேர்தல் நடைபெறவுள்ள நிலையில் அரசியல் கட்சிகள் தீவிர பிரச்சாரத்தில் ஈடுபட்டு வருகின்றன. இந்நிலையில் ஹரியானா பாஜக வேட்பாளர் தேர்தல் பிரச்சாரத்தின் போது பொது மக்களால் விரட்டியடிக்கப்பட்டதாக வீடியோ ஒன்று திமுகவினரால் பரப்பப்படுகிறது. 

இதே வீடியோவை காங்கிரஸ் கட்சியின் ஜார்கண்ட் மாநிலம் எக்ஸ் பக்கத்திலும் பதிவிடப்பட்டுள்ளது. அதில் சிர்சா (Sirsa) மக்களவை தொகுதி பாஜக வேட்பாளர் அசோக் தன்வாரை பொது மக்கள் விரட்டியடித்ததாகக் குறிப்பிடப்பட்டுள்ளது. 

உண்மை என்ன? 

பரவக் கூடிய வீடியோவில் ’SIRSA’ என்கிற பெயரும் ‘Bharat News’ என்ற லோகோவும் இருப்பதைக் காண முடிகிறது. இதனைக் கொண்டு இணையத்தில் தேடியதில், இதன் முழு வீடியோவை Pahredar Bharat News’ என்ற யூடியூப் பக்கத்தில் 2021, ஜூலை 11ம் தேதி பதிவிடப்பட்டுள்ளது. அதன் தலைப்பில் துணைச் சபாநாயகர் ரன்பீர் கங்வாவின் காரை விவசாயிகள் உடைத்தனர் என்று குறிப்பிடப்பட்டுள்ளது. 

மேற்கொண்டு இது பற்றித் தேடியதில், இச்சம்பவத்தின் போது எடுக்கப்பட்ட வேறொரு வீடியோவுடன் ‘News 24’ என்ற ஊடகத்தில் செய்தி வெளியிடப்பட்டுள்ளது. 

ஒன்றிய பாஜக அரசு 2020ம் ஆண்டு மூன்று வேளாண் சட்டங்களைக் கொண்டு வந்தது. இதற்கு எதிராக விவசாயிகள் பெரிய அளவில் போராட்டங்களை முன்னெடுத்தனர். அதன் ஒரு பகுதியாக 2021, ஜூலை மாதம் ஹரியானா மாநிலத்தில் உள்ள சிர்சா மாவட்டத்திலும் போராட்டம் நடைபெற்றுள்ளது. 

அப்போராட்டத்தின் போது அம்மாநில சட்டமன்றத்தின் துணைச் சபாநாயகர் ரன்பீர் கங்வாவின் (பாஜக) கார் கண்ணாடிகளை விவசாயிகள் உடைத்ததாகச் செய்திகளில் குறிப்பிடப்பட்டுள்ளது. இது தொடர்பாக விவசாயிகள் மீது வழக்கும் பதிவு செய்யப்பட்டுள்ளது. தற்போது நடைபெறவுள்ள நாடாளுமன்றத் தேர்தலில் பாஜக சார்பாக சிர்சா தொகுதியில் ரன்பீர் கங்வா  போட்டியிடவில்லை. 

மேற்கொண்டு காங்கிரஸ் எக்ஸ் பக்கத்தில் குறிப்பிட்டிருந்த அசோக் தன்வார் பற்றியும் தேடினோம். ஆம் ஆத்மி கட்சியிலிருந்த இவர் கடந்த ஜனவரி மாதம் அக்கட்சியில் இருந்து விலகி பாஜகவில் இணைந்தார். தற்போது பாஜக சார்பில் சிர்சா மக்களவை தொகுதியில் போட்டியிடுகிறார். 

இது தொடர்பாகச் செய்தியாளர்களைச் சந்தித்த அசோக் தன்வார் தன்னை பற்றி தவறான தகவலுடன் வீடியோ பரப்பப்படுகிறது என்றும் இது குறித்துத் தேர்தல் ஆணையம் நடவடிக்கை எடுக்க வேண்டும் என்றும் கூறியுள்ளார்.

இவற்றில் இருந்து இது 2021ல் பாஜகவைச் சேர்ந்த ரன்பீர் கங்வாவின் கார் கண்ணாடி உடைக்கப்பட்ட வீடியோ என்பதையும் அவர் தற்போது பாஜக சார்பில் சிர்சா தொகுதியில் போட்டியிடவில்லை என்பதையும் உறுதி செய்ய முடிகிறது. 

முடிவு : 

ஹரியானா தேர்தல் பிரச்சாரத்தின் போது பாஜக வேட்பாளர் பொது மக்களால் விரட்டியடிக்கப்பட்டதாகப் பரவும் வீடியோ குறித்த தகவல் உண்மை அல்ல. அது 2021ம் ஆண்டு பாஜகவைச் சேர்ந்த ரன்பீர் கங்வாவின் கார் கண்ணாடி உடைக்கப்பட்ட வீடியோ என்பதை அறிய முடிகிறது.

Please complete the required fields.




Gnana Prakash

Gnanaprakash graduated from University of Madras in 2017, with a Masters in Journalism and Mass Communication. He worked previously with a couple of other online news outlets as a Sub Editor.
Back to top button
loader