ஆவி பிடித்தல், கிராம்பை வாயில் வைத்திருத்தல் கொரோனாவை அழிக்குமா ?

பரவிய செய்தி

மதிப்பீடு

விளக்கம்

கோவிட்-19 தொற்றால் உடலில் ஆக்சிஜன் அளவு குறைந்து பாதிக்கப்பட்டவர்களுக்கு மருத்துவ ஆக்சிஜன் வைக்கும் நிலை இந்தியாவில் அதிகரித்து வருகிறது. இதற்கிடையில், தொற்று பாதிப்பு தொடர்பாக பல்வேறு மருந்துகளும், வீட்டு வைத்திய முறைகளும் வாட்ஸ் அப் உள்ளிட்ட சமூக வலைதளங்களில் கடந்த ஓராண்டிற்கு மேலாகவே பரப்பப்பட்டுக் கொண்டே இருக்கிறது. அவற்றில் ஒன்றாக, சில நாட்களாக மேற்காணும் தகவல் ஒன்று பரவி வருகிறது.

உண்மை என்ன ?

சித்தா ஆராய்ச்சி கழகத்தில் உள்ள விஞ்ஞானி ஹரிஹர மஹாதேவ் அவர்களிடம் தொடர்பு கொண்டு பேசுகையில், ” 50-60 செல்சியஸ் வெப்பநிலையில் வைரஸ் இறந்து விடும் என சொல்ல வாய்ப்பில்லை. நீரில் மஞ்சள், இஞ்சி போன்றவை கலந்து 3-5 நிமிடங்களுக்கு நீராவியை உள்ளிழுப்பதால் எந்த பாதிப்பும் இல்லை, அது கிருமிகளின் பெருக்கத்தை நன்றாகவே குறைக்கிறது. ஆனால், இதற்கு அறிவியல்ரீதியாக எந்த சான்றுகளும் இல்லை. எனினும், நீண்டகாலமாக நாம் பயன்படுத்தி வருவதன் மூலம் சொல்கிறோம்.

கிராம்பு வாயில் உள்ள அமிலத் தன்மையை மாற்றி விடும். குறிப்பிட்ட அமிலத்தன்மையில் வைரஸ் வளர்வதற்கான சூழ்நிலை இல்லை. ஆனால், கிராம்பில் வைரஸ் எதிர்ப்பு பண்புகள் இருப்பதாக தற்போது வரை எந்த ஆய்வுக் கட்டுரையும் இல்லை. இவற்றை பயன்படுத்துவதில் தவறில்லை, ஆனால் இதுதான் கொரோனாவை ஒழிக்க தீர்வு, தப்பித்து விடலாம் எனக் கூற முடியாது. இதை நம்பி வெளியே சுற்றுவது தவறு.

தேங்காய் பாலில் கிராம்பை கலந்து குடித்தால் ஆக்சிஜன் அளவு குறைவதை தடுக்கலாம் எனக் கூறுவது போல் ஏதும் கிடையாது. ஏனென்றால், தேங்காய் பாலை அளவுக்கு அதிகமாக எடுப்பதால் செரிமான பிரச்சனை ஏற்படும் வாய்ப்புள்ளது ” எனத் தெரிவித்து இருந்தார்.

இதுகுறித்து அலோபதி மருத்துவர் பிரவீன் கூறுகையில், நீராவியை உள்ளிழுத்தல் (ஆவி பிடித்தல்) தடிமனான சளி மற்றும் சைனஸைக் குறைக்க உதவும். இதன் மூலம் நெரிசல் குறையும் மற்றும் சுவாசத்திற்கு நன்றாக இருக்கும். இது கிட்டத்தட்ட அனைத்து பாரம்பரிய மருந்துவ முறைகளிலும் பயன்படுத்தப்படுகிறது. ஆனால், நீராவி கோவிட் தொற்றை கொல்லும் எனக் கூறுவது தவறானது. அது கோவிட் வைரஸைக் கொல்லாது. ஆவி பிடிப்பதால் எந்த தீங்கும் இல்லை, ஆனால் சூடான நீரைப் பயன்படுத்தும் போது எச்சரிக்கையாக இருக்க வேண்டும் ” எனத் தெரிவித்து இருந்தார்.

சமீபத்தில், ஒரு துளி எலுமிச்சை சாற்றை மூக்கில் விட்டால் ஆக்சிஜன் அளவு அதிகாரிக்கும் எனப் பரவிய வாட்ஸ் அப் தகவலை நம்பி கர்நாடகாவில் ஆசிரியர் ஒருவர் செய்து பார்த்து உயிரிழந்த சம்பவம் நிகழ்ந்தது.