’என் மண் என் மக்கள்’ யாத்திரையை பாராட்டிய காங்கிரஸ் எம்பி ஜோதிமணி எனப் பாஜகவினர் பரப்பும் பொய்.
பரவிய செய்தி
ராகுலின் நடைபயண யாத்திரையின் பெயரைக் கூட மறந்து, திரு. அண்ணாமலை அவர்களின் “என் மண் என் மக்கள்” யாத்திரையை எம்பி ஜோதிமணி சிறப்பு என்கிறார். யாத்திரையின் விளைவு பலே..
மதிப்பீடு
விளக்கம்
தமிழ்நாடு பாஜக மாநிலத் தலைவர் அண்ணாமலை கடந்த ஆண்டு ஜூலையில் தொடங்கிய ‘என் மண் என் மக்கள்’ யாத்திரையை கடந்த மாதம் 27 அன்று முடித்துக்கொண்டார். இதன் நிறைவு விழா பிரதமர் நரேந்திர மோடி தலைமையில் திருப்பூரில் பிரமாண்டமாக நடைபெற்றது. இந்நிலையில் “என் மண் என் மக்கள் மூலமாக தமிழ்நாட்டில் மிகப்பெரிய மாற்றம் நிகழும்” என்று கரூர் எம்பி ஜோதிமணி கூறுவது போன்ற வீடியோ ஒன்றை பாஜகவினர் பலரும் தங்களுடைய சமூக ஊடகப் பக்கங்களில் வைரலாகப் பரப்பி வருகின்றனர்.
ராகுலின் நடைபயண யாத்திரையின் பெயரை கூட மறந்து, திரு.அண்ணாமலை அவர்களின்
” என் மண் என் மக்கள்” யாத்திரை சிறப்பு என்கிறார்.யாத்திரை எபெக்ட் பலே.. pic.twitter.com/bYIJkRRl2G
— A.P. Muruganandam முருகானந்தம் (@apmbjp) March 3, 2024
மேலும் அப்பதிவுகளில், ராகுலின் நடைபயண யாத்திரையின் பெயரை கூட மறந்து, அண்ணாமலையின் “என் மண் என் மக்கள்” யாத்திரையை ஜோதிமணி சிறப்பு என்கிறார் என்றும் குறிப்பிட்டு பரப்பி வருகின்றனர்.
உண்மை என்ன?
பரவி வரும் செய்திகள் குறித்து ஆய்வு செய்ததில், எம்பி ஜோதிமணி இது குறித்து பேசிய முழு வீடியோ மாலைமுரசு யூடியூப் பக்கத்தில் மார்ச் 01 அன்று வெளியிடப்பட்டிருந்தது. அதில் “தமிழ்நாட்டின் மொத்த வசூல் ராஜாக்களாக பிரதமரும், பாஜக மாநிலத் தலைவரும் செயல்படுகிறார்கள். என் மண் என் மக்கள் மூலமாக தமிழ்நாட்டில் மிகப்பெரிய மாற்றம் நிகழும். பாஜக நோட்டாவுடன் போட்டியிட்டு பலமாகத் தமிழ்நாட்டில் தோற்கும்” என்று பேசியிருந்ததைக் காண முடிந்தது.
இதில் ஜோதிமணி “என் மண் என் மக்கள் மூலமாக தமிழ்நாட்டில் மிகப்பெரிய மாற்றம் நிகழும்” என்று பேசியிருந்த வீடியோவின் சிறுபகுதியை மட்டும் எடுத்து தவறாகப் பரப்பி வருகின்றனர்.
மேலும் இது குறித்து எம்பி ஜோதிமணியின் எக்ஸ் பக்கத்தையும் ஆய்வு செய்து பார்த்தோம். அதில், “ஹலோ பாஜக ஐ டி விங், அதெப்படி கொஞ்சம் கூட வெட்கமே இல்லாம வழக்கம்போல பாதி வீடியோவ மட்டும் கட் பண்ணி, பரப்பிக்கிட்டு இருக்கீங்க. இதோ முழு வீடியோ. “பாஜக நோட்டோவோட போட்டியிட்டு தோற்கும்”, என்னுடைய வீடியோவை பரப்பியதற்கு நன்றி” என்று குறிப்பிட்டு பதிவிட்டிருந்தார்.
ஹலோ பாஜக
ஐ டி விங் அதெப்படி கொஞ்சம் கூட வெட்கமே இல்லாம வழக்கம்போல பாதி வீடியோவ மட்டும் கட் பண்ணி, பரப்பிக்கிட்டு இருக்கீங்க. இதோ முழு வீடியோ. Enjoy“பாஜக நோட்டோவோட போட்டியிட்டு தோற்கும்”
Thanks for spreading my video @BJP4TamilNadu pic.twitter.com/TZPrIADmOt
— Jothimani (@jothims) March 3, 2024
இதன் மூலம் ஜோதிமணி என் மண் என் மக்கள் மூலமாக தமிழ்நாட்டில் மிகப்பெரிய மாற்றம் நிகழும் என்று நக்கலாகக் கூறியதை உண்மை என்று நம்பி பாஜகவினர் பலரும் சமூக ஊடகங்களில் பரப்பி வருகின்றனர் என்பதை அறிய முடிகிறது.
மேலும் படிக்க: ஒரு கழிவறை ரூ.90 லட்சமா ?.. கரூர் எம்.பி ஜோதிமணி பற்றிப் பரவும் வதந்தி !
இதற்கு முன்பும் எம்பி ஜோதிமணி குறித்து தவறாக செய்திகள் பரவின. அது குறித்தும் ஆய்வு செய்து நம் பக்கத்தில் கட்டுரை வெளியிட்டிருக்கிறோம்.
முடிவு:
நம் தேடலில், தமிழ்நாட்டில் ’என் மண் என் மக்கள்’ யாத்திரையை பாராட்டிய காங்கிரஸ் எம்பி ஜோதிமணி எனப் பரவும் செய்திகள் தவறானவை என்பதையும், அவர் பேசிய வீடியோவின் சிறு பகுதியை மட்டும் எடுத்து பாஜகவினர் பரப்பி வருகின்றனர் என்பதையும் அறிய முடிகிறது.
