பங்களாதேஷில் புர்கா அணியாத இந்துப் பெண்ணை பேருந்தில் ஏற்றவில்லை எனப் பரவும் சித்தரிக்கப்பட்ட வீடியோ!
பரவிய செய்தி
பங்களாதேஷில் ரமலான் மாதத்தில் புர்கா அணியாத இந்து பெண்களை பஸ்ஸில் அழைத்து செல்ல மாட்டார்கள்..
மதிப்பீடு
விளக்கம்
பங்களாதேஷில் ரமலான் மாதத்தில் புர்கா அணியாத இந்து பெண்களை பஸ்ஸில் அழைத்து செல்ல மாட்டார்கள் என்று கூறி 23 வினாடிகள் கொண்ட வீடியோ ஒன்று சமூக ஊடகங்களில் வைரலாகப் பரவி வருகிறது.
பரவி வரும் வீடியோவில், புர்கா அணியாததால் பேருந்தினுள் ஏற்றமுடியாது என்று பேருந்து நடத்துனர் பெண் ஒருவரிடம் வாக்குவாதம் செய்வதையும், மினி பேருந்து போன்று உள்ள ஒரு தனியார் வாகனத்தில் ஏறி அமர்ந்த அந்த பெண்ணை, பேருந்தை விட்டு இறங்குமாறு கூறி, அந்த பெண்ணை கீழே இறக்கி விடுவதையும் வீடியோவில் காண முடிகிறது.
बांग्लादेश में पवित्र रमज़ान के दौरान बुर्का न पहनने वाली हिंदू महिला को बस में यात्रा करने की अनुमति नहीं दी गई। pic.twitter.com/b8ZVwRlwqS
— हम लोग We The People (@ajaychauhan41) March 25, 2024
बांग्लादेश में पवित्र रमज़ान के दौरान बुर्का न पहनने वाली हिंदू महिला को बस में यात्रा करने की अनुमति नहीं दी गई। pic.twitter.com/bykoJohxHe
— Atish Sharma (@Atishsharma100) March 25, 2024
உண்மை என்ன?
பரவி வரும் வீடியோவின், முழு வீடியோ குறித்து அறிய வீடியோவின் கீபிரேம்களை கூகுள் ரிவர்ஸ் இமேஜ் செர்ச் மூலம் ஆய்வு செய்து பார்த்தோம். Carton Show என்ற ஃபேஸ்புக் பக்கத்தில் இதன் முழு வீடியோ மார்ச் 14 அன்று “ரமலான் மாதத்தில் புர்கா அணியாதப் பெண் பஸ் உதவியாளரை என்ன செய்கிறார்” என்ற தலைப்பில் பதிவு செய்யப்பட்டிருந்தது.
6:26 நிமிடங்கள் கொண்ட அந்த வீடியோவில், புர்கா அணியவில்லை என்று கூறி ஒரு பெண்ணை பேருந்தில் ஏற்ற மறுப்பதையும், உடனே அந்த பெண் ஆட்டோ மற்றும் மற்ற வண்டிகளில் ஏற முயற்சி செய்வதையும், புர்கா அணியவில்லை என்று கூறி மற்ற வண்டிகளிலும் ஏற்ற மறுப்பதையும் காண முடிகிறது. உடனே அந்த பெண் மீண்டும் பேருந்து நடத்தினரிடம் வந்து, மன்னிப்பு கேட்டு தலை முடியை கருப்பு சால்வையால் மறைப்பதையும், உடனே அந்த பெண்ணை பேருந்தினுள் ஏற்றுவதையும் முழு வீடியோவில் பார்க்க முடிகிறது. இறுதியில் பேருந்து நடத்துனர் வீடியோ பதிவு செய்பவரை பார்த்தே சில நிமிடங்கள் தொடர்ந்து பேசிகிறார்.
எனவே இது குறித்து அறிய அதன் ஃபேஸ்புக் பக்கத்தை மேலும் ஆய்வு செய்து பார்த்தோம். இதே போன்று பல வீடியோக்கள் அப்பக்கத்தில் பதிவு செய்யப்பட்டிருந்தன. அவை அனைத்துமே சித்தரிக்கப்பட்டு எடுக்கப்பட்டவை.
மேலும் Carton Show ஃபேஸ்புக் பக்கத்தின் சுயவிவரத்தையும் ஆய்வு செய்து பார்த்தோம். அதில் “நான் ஒரு கேமரா கண்டன்ட் கிரியேட்டர் (Camera Content Creator), மேலும் அறிய என்னுடைய பக்கத்தை பின்தொடருங்கள்” என்று குறிப்பிடப்பட்டிருந்தது.
இதன் மூலம் போலியாக சித்தரிக்கப்பட்ட ஒரு வீடியோவை உண்மையான வீடியோ என்று கருதி பலரும் சமூக ஊடகங்களில் தவறாகப் பரப்பி வருகின்றனர் என்பதை அறிய முடிகிறது.
முடிவு:
நம் தேடலில், பங்களாதேஷில் புர்கா அணியாத இந்துப் பெண்களை பேருந்தில் ஏற்றமாற்றமாட்டார்கள் என்று கூறி பரவும் வீடியோ உண்மையானது அல்ல என்பதையும், இது போலியாக சித்தரிக்கப்பட்ட வீடியோ என்பதையும் அறிய முடிகிறது.